Kaflaskil hjá KAPP eftir áratuga þjónustu við bílvélar

May 20, 2026

KAPP hefur lokað þeim kafla í sögu fyrirtækisins sem snýr að móttöku og viðgerðum á bílvélahlutum, en heldur áfram að byggja á langri sögu með áherslu á þjónustu, tækni og lausnir fyrir íslenskan og alþjóðlegan iðnað.

KAPP hefur ákveðið að loka þeim kafla í sögu fyrirtækisins sem snýr að móttöku og viðgerðum á bílvélahlutum. Frá og með 1. maí 2026 hefur móttöku og viðgerðum á heddum, blokkum, sveifarásum, knastásum og sambærilegum hlutum verið hætt.

Þetta eru ákveðin kaflaskil í langri sögu KAPP. Rætur fyrirtækisins ná aftur til ársins 1929 þegar fyrirtækið Egill Vilhjálmsson hf., bifreiðaverkstæði og varahlutaverslun, var stofnað. Sú starfsemi þróaðist í gegnum áratugina og varð síðar hluti af því fyrirtæki sem KAPP er í dag, öflugu íslensku tæknifyrirtæki sem sinnir kæliþjónustu, vélasmíði, tækniþjónustu og lausnum fyrir sjávarútveg, fiskeldi, matvælaiðnað og annan iðnað. KAPP á uppruna sinn að rekja til vélaverkstæðis Egils Vilhjálmssonar hf sem stofnað var árið 1929. Síðan þá hefur fyrirtækið orðið brautryðjandi í kælitækni og þjónustu. Okkar markmið er alltaf að bjóða upp framúrskarandi vörur og lausnir ásamt því að veita fyrsta flokks þjónustu.

Í gegnum árin hefur bílvélaverkstæði KAPP þjónustað fjölda einstaklinga, verkstæða og fyrirtækja um allt land. Við erum þakklát fyrir það traust sem viðskiptavinir hafa sýnt okkur í gegnum áratugina og viljum færa þeim bestu þakkir fyrir viðskiptin og samstarfið.

Með þessu hyggst KAPP skerpa á meginstarfsemi sinni og halda áfram að byggja á sinni löngu sögu með áherslu á þjónustu, tækni og lausnir fyrir sjávarútveg, fiskeldi, matvælaiðnað og annan iðnað.